1415. Dezember 31. Czarnowanz

In Gotis namen Amen. Wir Petrus Borg von Gotis gedult Probist czu Czarnowans, vnd Anna Schidogrosyna Preyelynne, Bronika Suppreyelynne, Offka Cantrix, Barbara Custrix, Elschka Ogomka Circatrix, mit dem ganczen Conuent Bekennen vffintlich in desem brife allen den dy en seen horen adir lesen, das eyn entscheit geschen ist czwusschin vns an eyme theyle Vnd den Erbern lauten Merten Schiwek Schultis, Maczko Cloczek, Miczko Cherzenst, Jan Pyenroschek, Pauel seyn bruder etc. des ganczen dorffis czu Sackeraw an dem andir theile, dy selben ynwoner gekofft haben das Vorwerk czu Pylchewicz, das yn vnse kirche gehorit vnd gehort hat von aldirs, das dy obgenanten Sackerer vndir sich geteylt haben das selbe Vörwerg, Do von ze dem Clostir Czarnowans gebin sullin eyn firdunk grosschen alle Jar ierlich zu gebin vff synthe Mertins tag vor Oppir vnd vor Synthe Petirs pfennyk, mit sulchir vndirscheit ab Pylchewicz wedir aws gesaczt worde mit lewten zo sullin dy ynwoner zu Pylchewicz gebin gleich also vil als andir darffir, dy in vnser kirche gehoren. Auch vnschedelichin vnserm Czendin, den wir och zu Pylchewicz haben, do von vns dy besiczer alle ior ierlich gebin sullen eyne halbe mark grosschin vff den selbin synthe Mertins tag bey dem banne, den ze vns vnd vnsern nochkomligen gebin sullin. Den selbin entscheit globe Wir Gancz vnd stete zu halden. Vnd vorbas dy obingeschreben Sackerer von vns vnd (vnsern) nochkomligen vmb dy obingeschreben sachin vmbekommert vnd vmbeswerit bleibin sullin. Des czu eynem woren bekentnisse haben wir vnsir ingesegil an desin briff gehangen. Gegeben czu Czarnowans am nesten Dynstage noch Gotis Geborte Als man schreibit dornoch firczenhundirt ior vnd yn dem sechczenden jore.

Das elliptische Siegel des Pröpsten zeigt die Mutter Gottes, stehend, mit der Umschrift: † s. prepositi. domus. dei. alias, czarnowans.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.